წინასაარჩევნო პერიოდებში და შესაბამისად, ეგზიტპოლების შემთხვევებშიც, საზოგადოებრივი აზრის ფორმირება ძირითადად ხდება რამდენიმე კვლევითი ორგანიზაციის მიერ, რომლებიც ავტორიტეტულად და საერთაშორისოდ მოიხსენიებიან. თუმცა, აღნიშნული ორგანიზაციების სტატუსისა თუ იმიჯის მიუხედავად, მათ მიერ წარმოდგენილი წინასაარჩევნო კვლევებისა ეგზიტპოლების შედეგები, რიგ შემთხვევაში ერთმანეთისგან იმდენად განსხვავებულია, რომ ინტერესთა ჯგუფების მხრიდან ბრალდებების საფუძველიც კი ხდება. მონაცემთა ანალიზის განსხვავებული სტრატეგიები, თავისთავად, სავსებით ბუნებრივი, მისაღები და უფრო მეტიც, სასურველი მოვლენაა, რადგან საკვლევი საკითხის უფრო მრავალმრივად კვლევის წინაპირობას წარმოადგენს და ურთიერთშემავსებელ საინფორმაციო წყაროებად შეიძლება განვიხილოთ. თუმცა, იმ შემთხვევაში, როდესაც ხდება მხოლოდ შედეგების გასაჯაროება, მაგრამ მონაცემთა ანალიზის შესაბამისი მეთოდები, აგრეთვე კვლევის ინსტრუმენტი და გაზომვის ტექნიკა უცნობია, განსხვავებული მონაცემები ურთიერთშემავსებელი ინფორმაციის ნაცვლად, საინფორმაციო ვაკუუმის წყარო ხდება.

​

2020 წლის არჩევნების, წინასაარჩევნო კვლევებისა და ეგზიტპოლების შედარებითი ანალიზი საფუძველს გვაძლევს დავასკვნათ, რომ კვლევითი კომპანიების შედეგებს შორის განსხვავება ძირითადად გამოწვეულია მონაცემთა ანალიზის ტექნიკებით. პირველ რიგში არ არის გათვალისწინებული, რომ რესპონდენტების განაწილება, რომლებიც უარს ამბობენ ეგზიტპოლებში მონაწილეობაზე საკმაოდ მაღალია (თითქმის 35%-50%). მეორე მხრივ, ამ სიხშირებიისთვის არ ხდება ანალიტიკური წონების სწორად მინიჭება ანუ ალოკაცია. აღნიშნულ კონტექსტში, ტერმინმა „ალოკაცია“ საქართველოს სოციალურ-პოლიტიკურ სივრცეში განსაკუთრებული აქტუალობა შეიძინა. შედეგების გასაჯაროებისას, როგორც წესი, მას განმარტავენ როგორც „რთულ მექანიზმს“, რომლებსაც მკვლევრები იმ ადამიანების არჩევანის გამოსაცნობად იყენებენ, რომლებმაც კონკრეტული პასუხის გაცემა არ ისურვეს და ამას მათ მიერ სხვა შეკითხვებზე გაცემულ პასუხებზე დაყრდნობით ახერხებენ. თუმცა, კონკრეტული მეთოდოლოგიური მიდგომისა და პროცედურების ხელმისაწვდომობა გამოწვევად რჩება. ამიტომაც, მნიშვნელოვანია ალოკაციის/ანალიტიკური წონების მინიჭების, როგორც მეთოდის შესახებ ინფორმირებულობის გაზრდა საზოგადოებაში.